Çağrı Mərkəzi: 960
Əqli Mülkiyyət Agentliyi və Fövqəladə Hallar Nazirliyinin Akademiyasının birgə təşkilatçılığı ilə maarifləndirici konfrans keçirilib

Əqli Mülkiyyət Agentliyi və Fövqəladə Hallar Nazirliyinin Akademiyasının birgə təşkilatçılığı ilə maarifləndirici konfrans keçirilib

Əqli Mülkiyyət Agentliyinin tabeliyində olan Patent və Əmtəə Nişanlarının Ekspertizası Mərkəzinin və Fövqəladə Hallar Nazirliyinin Akademiyasının birgə təşkilatçılığı ilə “Sənaye mülkiyyətinin obyektləri və onların qeydiyyatı” mövzusunda maarifləndirici konfrans keçirilib.

Əqli Mülkiyyət Agentliyinin əməkdaşları Akademiyada Heydər Əliyev Mərkəzinin fəaliyyəti, fənn kabinetləri, laboratoriyalar və ali təhsil müəssisəsinin 15 illik fəaliyyətini əks etdirən muzeylə tanış olublar.

Konfransı giriş sözü ilə açan Fövqəladə Hallar Nazirliyinin Akademiyasının Elmi tədqiqat şöbəsinin elmi katibi Röya Əmirova Əqli Mülkiyyət Agentliyi ilə əməkdaşlığın davamlı olmasının əhəmiyyətini vurğulayıb. Qeyd edib ki, Akademiyanın tələbələrinin əqli mülkiyyət sahəsində biliklərinin artırılması üçün Agentlik ilə birgə layihələrin həyata keçirilməsi faydalı olar.

Akademiyanın Qiyabi təhsil fakültəsinin rəisi, polkovnik, texnika elmləri doktoru, professor İlqar Dadaşov və Kadrların yenidən hazırlığı və ixtisasartırma fakültəsinin rəisi, polkovnik Elçin Mahmudov əqli mülkiyyətə dair təlimlər zamanı bu sahədə olan mütəxəssislər ilə aparılan canlı müzakirələrin Akademiyada təhsil alan gənclərin yaradıcılıq potensialını daha da inkişaf etdirəcəyini vurğuladılar.

Görüşdə Patent və Əmtəə Nişanlarının Ekspertizası Mərkəzinin İxtira və faydalı modelin ekspertizası şöbəsinin müdiri Sevinc Zeynalova ilk növbədə tədbirin təşkilinə görə Akademiya rəhbərliyinə təşəkkürünü bildirərək, bu konfransı qarşılıqlı əməkdaşlığın ilk addımı kimi dəyərləndirib.

Tədbirdə Mərkəzin İlkin ekspertiza və sənaye nümunələrinin ekspertizası şöbəsinin müdiri Afət Qasımova “Patent hüququ obyektləri və patentin alınmasına dair iddia sənədinin tərtibatı və verilməsi”, şöbə müdiri Sevinc Zeynalova “Əqli mülkiyyət obyektlərinin mahiyyəti üzrə ekspertizanın aparılması” və “Beynəlxalq və regional patentləşdirmə prosedurları”, Mərkəzin sektor müdiri Natəvan Talışova “Kimya və tibb sahəsi üzrə iddia edilən ixtiraların tərtibatının xüsusiyyətləri” mövzusunda təqdimatla çıxış ediblər. Təqdimatlarda xaricdə patentləşdirmə proseduru, Patent Əməkdaşlıq Sazişi (PCT) sistemi ilə beynəlxalq iddia sənədlərinin patentləşdirilməsinin üstünlükləri, ixtiraçılıq fəaliyyətinin stimullaşdırılması üçün ixtiraların və faydalı modellərin PCT beynəlxalq sistemi vasitəsilə xarici dövlətlərdə patentləşdirilməsi haqqında məlumat verilib.

Mərkəzin İlkin ekspertiza və sənaye nümunələrinin ekspertizası şöbəsinin baş-məsləhətçi eksperti Könül Əmircanova, həmin şöbənin baş məsləhətçi-eksperti Nazilə Cahangirova və Mərkəzin eksperti Firuzə Bəhramovanın çıxışları da maraqla qarşılandı.

Tədbirin sonunda bakalavrlar, magistrlər, dissertantlar və professor-müəllim heyətinin ixtiraya dair tələblər, patentlərin alınması və tanınması şərtləri barədə sualları Agentliyin nümayəndələri tərəfindən cavablandırılıb.

Əqli Mülkiyyət Agentliyinin İdarə Heyətinin sədri Kamran İmanovun müəllifi olduğu əqli mülkiyyətə dair kitablar Fövqəladə Hallar Nazirliyinin Akademiyasının kitabxanasına hədiyyə edilib.

Sənədlərin ONLAYN qəbulu PƏNAHAppealTransferi Mərkəzi saytReyestrÇağrı Mərkəzi MəlumatElektron XidmətlərElektron xidmətlərdən istifadə ilə bağlı statistik məlumatlarstartup51ZəfərErməni saxtakarlığının ifşasıAggression of Armenia against AzerbaijanHerbi tecavuzhttps://azranking.az/startup2https://www.epo.org/index.htmlhttps://www.eapo.org/ru/
Search×